25 di Mai fieste de Patrie Argjentine

     Nol è facil contâ in forme ristrete une date cussì impuartante come cheste, za che la rivoluzion dal mes di Mai dal 1810, al implicà un cambiament critic che al à marcât un prin e un dopo te storie Argjentine.

     Come fat esterni, o podin menzonâ la invasion Napoleoniche in Spagne, che e à provocât la destituzion dal Re spagnûl "Fernando VII", che al è stât subit rimplaçât par un fradi di Napoleon Buonaparte di non Sêf, e coronât Re cul non di “Josè Iº”, il popul spagnûl subit lu batià cul sorenon di "Bèpo butilie" pal fat che i plaseve bevi.

     Cheste gnove situazion spagnole insiemi ad altris sucès che a passavin internementri, a rivarin a fâ si che lis coloniis Americanis, a forin pensant che jere rivade l'ore di separâsi dal domini Iberic, di fat tal "Virreinato del Rio de la Plata", si cuistione la autoritât dal "Virrey Cisneros", che al guviernave chestis tieris, sot i ordins dal Re Spagnûl.

     Il 22 di Mai dal 1810 si realizà il clamât "Cabildo Abierto", formât dai vicins, une misture di creoi e spagnûi, dai plui notabii de citât di Buenos Aires.

     Cheste riunion e jere stade solecitade al cognossi i sucès Spagnûi. Ta cheste assemblee vierte si decît separà de sô incarghe al "Vice Re" Cisneros. Finalmentri e daspò di lungjis discussions, cul popul riunît te place, il vinars 25 di Mai dal 1810, si forme il prin Guvier de Patrie Argjentine, cu la presidence dal Brigadîr Cornelio Saavedra.

     La prime strofe dal imni Nazionâl Argjentin, (traduzion proprie)
--
Sintît mortâi l'urli sagrât,
Libertât.....libertât....libertât,
Sintît rumôr di rotis cjadenis,
Viodêt tal tron la nobil paritât
--
Oid mortales el grito sagrado
Libertad, liberad, libertad
Oid el ruido de rotas cadenas
Ved en trono a la noble igualdad.
---

" Taller de furlan

     Il " Taller de Furlan " al funzione te sede de Societât Furlane di Buenos Aires, clamade la None. Li,  une volte par setemane si cjatin  un grup di personis, formât di furlans natîfs che a àn emigrât a la Argjentine in agns passats ; i lôr dissendents di prime e seconde gjenerazion, e ancje i nestris amîs. 
---
     
A son za trê agns che al funzione, e a chest pont o pues dî come coordenadôr dal stes, che il motôr fondamentâl che lu fas movi al è l'entusiasim dai partecipants e la lôr costance regolâr tal assisti aes riunions.
 ...
     E o capis che dut chest entusiasim al nas de propueste di chest
" Taller ": che i lôr partecipants a àn cjatât un spazi comun des lôr lidrîs furlanis, tun marc e tun clime di amicizie e cjamarance, dulà che no dome si po sintî a fevelâ e a lei in furlan, ma ancje cjantà i nestris cjants e " Vilotis ", come ancje un tango, cul acompagnament di une armoniche.
     Un cafè, un taiut di vin, e ogni tant une cene in amicizie, cu la spese ( impuartant ) " ae romane ".
 ---
Riferintmi al ûs dal idiome furlan tal grup, si po dì che son trê tips di situazions basichis :

1) Personis che lu fevelin ben par sei la lôr Marilenghe, che lu scrivin pôc e lu lein cun cualchi dificoltât.

2) Personis che lu capissin vonde, pal fat che di fruts lu àn sintût de bocje dai lôr paris o nonos, ma che lu fevelin pôc, no san scrivilu e lu lein cun dificoltât.

3) Altris, che a son i mancul, a fevelin nome Spagnûl o Talian.
 ---
     Par tant al significhe che se ben o cirin di fevelà plui che si po in furlan, al è inevitabil che la grant part dal svilup dal grup si lu fasi in Spagnûl.
 ---

Riassumint: chest " Taller " nol è un cors di furlan, cundut che i nestris sfuarçs par avanzâ te cognossince dal idiome, utilizant il bondant materiâl didatic che al dì di vuê si cjate su internet, a dan i lôr risultâts positîfs, za che si va imparânt, ancje se a.......sburtons...

Un salût a ducj voaltris, mandi.
---

Letare vierte, le à scrite Anute Leonarduzzi

Nassude a Bunzic, di Dignan al Tiliment, e je de classe dal 24, rivade in Argjentine tal 1951, e vîf a Rosario,di Santa Fé, Argjentine za da une cincuantine di agns,

No ai modificât la grafie origjinâl di cheste letare, conservânt la naturalitât che àn tal fevelâ il furlan in chestis tieris, dulà che tancj a lu fevelin, ma pocs lu scrivin. In chest sens cheste letare e je une risorse culturâl di tegni da cont.

La letare di Anute

Sciòr Galliano, vuè o ai decidùt contaus la storie de me vite in te filande...Apene finide la scuele elementàr a mi an mandade a imparà a ricamà, jo o volevi seguì lis scuelis e rivà a mestre ma no si podeve, e cussì che rivade a 15 ains mi mandarin in filande, ce tantis lagrimis¡¡¡¡¡¡¡¡
Al ere un grant staliment, cun tre sezions, cun 30 bacinelis dulà che simpri a veve di sta l'aghe cialde a 70g. e li sentade par 8 oris devant di ogni bacinele, che puarete cai tociave a leve a ciase cu lis mans plenis di viscis.
E iere la maestre che ca veve il mistìr di tirai fùr la sede a la galete...Ches puaris frutis di 15 ains a si clamavin " scaulinis ", a vevin il dovè di preparai la galete za spelade presentaiale a la maestre par scomenzà il so lavòr. Dut a leve ben sa l'ere ben fàt, se no tantis cridadis, e ancie plui di une volte ti tiravin cu l'aghe cialde, a ere une tiranie.
Ance la " scauline " a veve une cialderie ca faseve cuei la galete, e veve une spazule taronde eletriche ca zirave parsore de galete fin ca non d'ere plui spelae, e finalmentri al saltave fùr chel biel filut colòr oro che si clame sede¡¡ alore la " scauline " ial passave a la maestre, ie a unive 5 o 6 galetis e las peave a un disco eletric cal zupave la sede fin cal vignive fùr il bigàt.....
Daur des spalis la maestre a veve lis daspis ca lis menave cui pedài e ancie une frutate la " ingropine " ca veve il compit di ingropà la sede cuant ca si rompeve, ma no veve une sole maestre di contentà, ma ben 5, come la "scauline " no rivave da par dut alore, sa vignive a savelu la diretorie ti clamave al ordin e a voltis ance une sospension.
Si entrave come "scaulinis" dopo poc si passave a "ingropine" e al final maestris. Però no l'ere dome il lavòr al'ere ance l'odòr dai bigaz, insapuartabil...
La sede si imbalave e si mandave a Milan a la "Casa Centrale" e di lì par dut il mont a fa lis cialcis di sede a lis scioratis di chei timps.
Io purtrop no ai podùt compràlis ( e lis varès meritadis ) ce ingiustizie¡¡¡¡¡¡¡¡¡
Ma no finive li la nestre cròs. Ogni maestre a veve la so matricule, e fin ca no rivave rispueste a si viveve cul còr in boce, o cul flat tal pùgn (come a diseve puare mame).La domenie pòc si podeve iudà in ciase cun chès mans tant maltratadis. Il lunis di gnûf il scivilòt nus clamàve, e vie contentis smenteant duc i dolors¡¡¡ a si ere tant zovinis.
E cussi po scior Galliano, chiste storie a finis in glorie,(però ie veretàt). O speri mi perdoni il mal scrit e lu prei ca mi fasi savè sa i rive. O lei simpri la so pagine ca mi puarte une bugade di aiar furlan. GRAZIE¡¡¡¡¡¡¡¡¡¡¡
Un mandi di cur a dute la clape furlane di Buenos Aires....ju salude. ANUTE.
---

L'orcolat di îr...e di vuê......

Lis glesiis  si sdrumarin, lis citâts i paîs e i borcs ancje a forin strucjâts cuntune fuarte scjassade di taramot, al sucedeve ai 6 di Mai dal 1976, a jerin lis 9,06 di sere, l' orcolat al jere za te memorie dai furlans.

Bielza a son passats 33 agns di chel fatidic 6 di Mai dal 1976. L' orcolat che al abitave tai interiôrs dai monts Mariane e Sant Simeon, al decit ( vadi Diu a savè il parcè ) di dâ une sdramassade cui risultâts che ducj o cognossin.

Navigant su internet o ven a scuvierzi alc sui moviments sismics in Friûl e te vicine Slovenie, no varès mai pensât che si dessin cuntune frecuence cussì impuartante, o ai cjatât une tabele dulà che dîs, che dal mes di Lui dal 2004, al mes di Març dal 2009, a son stadis plui di 50 scossis di taramot, che van dal ( 1,07 al 4,02 ) dai valôrs seont la scjale Richter, dut chest lu a pandût la Universitât dai Studis di Triest.

Mi ricuardi che o jeri frut e che o sintivi me none Marie a dî,

 - vêso sintût il taramot îr sere - ?

-----------------------------------------------------

L'orcolat...di vuê al decît di fâ une scjampade tai Abruçs, cu lis stessis conseguencis che a sucedin in chescj câs, distruzions di vitis umanis e di bens. O speri, anzit o soi sigûr, che ancje cheste volte la fuarce di volontât di chestis popolazions e tornaran a rimetisi in pins cjalant viers l'avignì. Purtrop no si sa cuant che l'orcolat al decidarà di agjì une altre volte.

---