martes, 28 de julio de 2009

Ricuarts furlans…la storie di un baûl.

     Gno barbe Svualdin al jere marangon, al savè che gno pari al partive pe Argjentine, (al jere cence lavôr par no vê lis ideis dal regjim dal moment), ai fasè un biel baûl cu la bree dai arbui dai nestris boscs.

     Me mari e jere gravide (a jerin apene sposats), cul cûr sglonf di lagrimis i preparà il baûl plen di straçs e di ilusions.
Tal 1924 gno pari e il baûl a viazarin a la Argjentine. Daspò di vot bruts agns, si jere te crisi dal 30, al decidè di tornà. Cussì al finive ancje il pelegrinaç dal puar baûl.
 ---
     Sigûr che al varà pensât fra di se:

- Varaio finît di lâ pal mont, mi lassarano in pâs ? -
- Achii almancul ta cheste stanziâte e ven cualchi surisute a fami compagnie,
che al è simpri miôr che cori atôr. -
 ---
     Verementri lu àn lassât cuiet vincj agns.
Someave che nissun si ricuardàs di lui, ma purtrop une dì, di sburide e jentrà une frutate, lu à puartât fûr tal curtîl e cun amôr lu netà e lustrà, po sotvôs i disè: - Puarìn tu mi fasis dûl, prepariti che  tu tornis a partî e cheste volte cun me in Americhe -
     Mancumâl che no à capît ce che ai disè tal so lengaç. Puar baûl cence voie al à scugnût partî e passâ l’ocean une altre volte, di gnûf in Argjentine.
 ---
     Vuê al è a Rosari, strac di cori pal mont, al spere che lu lassin in pâs, al è vueit, nol à nuie di materiâl dentri, però si che al è plen di siums e di ilusions che nissun mai podarà robassilis.
O varès capît che la frutate o jeri jo, Anute.
E cussì  il destin nus à puartât in Argjentine. Al baúl  lu rosearà il carûl e jo o lassarai i miei vues culì, par coltâ cheste benedete tiere che o ai amât e o amarai simpri fin che o vîf.
---
     Cheste conte me à fâte vê la Siore Anute Leonarduzzi di Rosari, che bielzà in altris oportunitâts e colaborà cun chest blog. Le ringraciin pe sô colaborazion simpri tant spontanie e simpatiche.
--

lunes, 20 de julio de 2009

Ai 20 di Lui, il Dî dal Amì



A cuarante agns dal sucedût.

O jerin tal an 1969 e la corse par concuistâ il spazi e sarès rivade al sô pont culminant. L'om al stave par rivâ te Lune.
Chest inzirlôs ritmi par trasponi lis frontieris de tiere par rivâ ai confins dal univiers, al voleve dì vicinâsi simpri plui ad altris oms cun ideologjiis, religjons e razis diferentis.
Si cjapave cussience che unìnsi tra pârs al varès judât al om stes plui rapidementri di rivà ai soi obietîfs, za che la concuiste de Lune e veve incaparât la atenzion e ancje l'interès di dute la umanitât.

Il lavôr e la union di dutis chestis personis par rivâ ae mete desiderade, e à fat si che Enrique Ernesto Febbraro professôr in: psicologjie, filosofie, storie e ancje music e dentist, cundiplui al è stât candidât par ben dôs voltis al premi Nobel de Pas, si sedi sintût motivât devant di chescj sfuarçs, za che l'om al stave costruint une aleance cence frontieris, scomençant a stabilî vincui di amicizie tra dutis lis personis di cheste tiere, e di altris planetis, tal remot câs di cjatâju.
E cussì al è stât che dopo lungjis tratativis, si conven che ai 20 dal mes di Lui dal 1969 ( e dai agns a vignì) di che dì che an metût pît te Lune, al sarês stât celebrât come il "Dì dal Amì". Cul lâ dal timp, l'Argjentine dute e ancje in altris paîs de Americhe Latine, si è lade difondint cheste zornade de amicizie.
 ---
Par tignì da cont de amicizie:

Un amì nol da conseis, se al po al jude.
Al è miôr tasê, ancje vent reson; mai si barufe, se un dai doi nol vûl.
Compagnâ simpri te solitudin, tal dolôr o te ligrie.
Smenteâsi dai propris problemis, e scoltâ cu lis orelis e cul cûr di amì.
Il gno amì al è il gno mestri, il gno dissepul e il gno compagn di scuele.
I "Sacraments" de amicizie a son:
Simpatie, afiet, rispiet, lealtât, comprension, disinterès e ligrie.
---

miércoles, 1 de julio de 2009

Nus a visitât la Dot.esse Priscilla De Agostini




Joibe ai 21 di Mai dal 2009, il "Taller di Furlan" al ricevè a la Dotoresse Priscilla De Agostini, di visite in Argjentine.
Priscilla e à studiât te Universitât dai Studis di Udin, si e laureade in conservazion dai bens culturai cun la tesi sui "Rits e Tradizions dal Solstizi di Istât in Friûl”. A partecipe in ativitâts vincoladis ai temis des Lenghis e Culturis minoritaris, sui aspiets leâts aes tradizions, la musiche popolâr e la oralitât, dut documentât in audio e video.
Atualmentri e je relazionade cul CIRF, Universitât dal Friûl, par disvilupâ e profondâ il lavôr te formazion dai insegnants di Lenghis minoritaris.
O vin preparât il Salon "Fogolâr" de nestre Societât, par sintî lis peraulis di Priscilla, e dopo vele presentade e su la base dal materiâl puartât che veve su la taule, e je lade svilupânt i diviers temis di sô competence.
Priscilla nus a puartât pe nestre biblioteche une grande cuantitât di materiâl: libris di leture, cors di furlan, DVD, cd, donazions di distints Ents, cui cuai jê e je relazionade, e che ducj nô o ju ringraciin.
Cu la sô cordialitât, simpatie e professionalitât, e à savût no dome vê la nestre atenzion, ma ancje sveâ in te concorence un particolâr interès sui temis tratâts.
Lis domandis che a i forin fatis, a son stadis rispuindudis cun dute capacitât.-
Finide la presentazion, il "Taller" ai mostrà a Priscilla une des ativitâts che o puartìn indevant: cjantâ cjants furlans e ancje un tango Argjentin.
Nus compagnave une armoniche e un flaut.
--
La serade si e prolungjade cuntun brindis e alc di meti sot i dincj.
Il nestri President, Siôr Milio Crozzolo, ai à consegnât un ricuart dal so passaç pe Istituzion.
---
Priscilla e je stade invidade a partecipâ tune audizion di radio Magna “Benvignude Furlanie”,  programe puartât indevant pe Prof.sse Cecilia Brumat e l’Inzegnîr Fabian Prez. Ju ringraciin a ducj i doi.
Sperìn vioditi prest, ti spietin.
---