miércoles, 24 de junio de 2009

Carlos Gardel



Vuê a fasin 74 agns de tragjiche fin di Carlos Gardel, sucedût tun acident di aviazion a Medellin in Colombie, ai 24 di Jugn dal 1935.
Al jere nassût a Toulouse in France tal 1890 cul non di Charles Romuald Gardès. Altris storiis a disin che al è nassût a Tacuarembó, te Republiche Orientâl dal Uruguay.
Al rivà a Buenos Aires cun dome trê agns di etât cun so mari "Doña Berta". Issint ancjemò une vore zovin al scomence a cjantà tai "Cafetines"dal Abasto, cuartîr "Porteño" dulà che al passe i prins agns di frut e di zovin adolessent.

Chest cuartîr si clame "Abasto" pe presince di un marcjât furnidôr di pomis e verduris, al è situât te "Avenida Corrientes" de citât di Buenos Aires, vuê si è mudât tun elegant "Shopping".
A gardel za tal 1910 si lu scomence a cognossi cui nons dal "Morocho del Abasto", e ancje "El Zorzal Criollo", il Zorzal al è un uciel une vore cjantarin.

Ta l'an 1913 si forme il duet Gardel-Razzano, che a interpretavin cjançons dal repertori Creol-Argjentin, fasint presentazions no dome in Argjentine, ma ancje tal Uruguay, Spagne e France.
Fintremai l'an 1917 il tango al jere dome strumentâl e si lu balave, in chel an Gardel al interpretà il prin tango cun peraulis par sei cjantât, cul titul di "Mi noche triste".

Ca sot o ves la direzion dal museu:

Te decade dal 30 za al jere une figure celebre, tant che la Paramount Pictures Corporation lu vûl come protagonist in cuatri peliculis, che a son stadis fatis in France.
Tal 1933, al viazà tai Stâts Unîts di Americhe, e al esordi a New York, al à regjistrât dai discs, cjantât par radio, e filmât peliculis di gjenar musicâl di esit.
Dopo l'incident, la sô spoie e fo rimpatriade e compagnade da une slavine di int a pît partint dal Luna Park pe "Avenida Corrientes" fin a rivà tal cimitieri di "Chacarita" te citât di Buenos Aires, dulà che e je sepulide intun Mausoleu e che al dî di vuê a continue a sei mete dai soi numerôs amiradôrs
--
E ancje ducj o savin che “Carlitos” al cjante ogni dì miôr. 
O podarès rindisi cont, se o clicais culì sot:
--

martes, 16 de junio de 2009

Madone di Mont


Il santuari di Madone di Mont al è il plui antîc de Regjon dal Venit, e un dai prins Santuaris Cristians. Il puest al par che al sedi stât une postazion dal Esercit Roman, trasformantsi tal timp tun paîs.

I Slâfs si stabilirin te regjon tal secul VIII, e clamavin a Castelmonte, il "Mont Antîc" (Stara Gora) e ae Madone, la "Vergjine Antighe". Cussì ancje a clamavin "Citât Antighe" al atuâl Cividât dal Friûl, distant dal Santuari un 9 chilometris cirche.
Za tal 1200, la Glesie di Sante Marie di Mont, e jere une des plui impuartantis dal Patriarcjât di Aquilee.

La statue de Vergjine cul Bambin, che si venere al dì di vuê, e je stade intronade tal an 1479, al inaugurà il gnûf santuari, rifat dopo un incendii.
La statue, in piere massice che sostituîs une precedent, probabilmentri di len, e risalte il valôr de maternitât de Vergjine dant il pet al bambin Jesù.
---
Se ben vuê si po rivâ cu la machine fin sul plaçâl dal Santuari, in altris epochis pelegrinâ a Madone di Mont si lu faseve cuntun ben altri spirt, che al jere chel de fede e de pinitince, intant si leve su a pît, e cualchidun ancje discolç, cumplint une promesse o un avôt fat ae Madone.
Jo mi visi che di frut o levi cun dute la famee dai Milanês, (cun chest sorenon  si cognosseve a Tresesin i De Agostini).
Si rivave fin sot de mont cul cjar e si leve su a piduline.
¡ Ariviodisi Madone di Mont, pas e ben ¡
---
Madone di Mont e à il so Santuari ancje in Argjentine, la parochie si clame
" Nuestra Señora de Castelmonte ", si cjate te localitât di “Pablo Podestá” in provincie di Buenos Aires. La imagjin de vergjine more che li si venere e je rivade al paîs tal Novembar dal 1970.
Tal stes lûc al funzione la “Unione Friulana Castelmonte”, un puest di incuintri de numerose coletivitât furlane.
---

miércoles, 3 de junio de 2009

"Ricuarts" Il zuf di none Anzule


I mei nonos, Zuan Rivoldini e Anzule Grosutti, e an vut vot fiis, dome mio pari di om,a son nas ducju a Bertiûl, dome a mio pari e an podut mandalu a imparà il misteir di marangon, lis frutis (a'nd'erin siet ) cuant ca finivin dodis ains a lavin a lavorà in filande.
--- 
Il nono al faseve il marangon, e al veve un tocut di tiare pa la strade de Santissime, al semenave dut ce cal podeve, cuant cal veve une biele coce, ( di 2 o 2 chilos e mieç ) a la partave a cjase , e la none a faseve il zuf te cjalderie de polente.
La gnot prime a meteve la coce taiade a tocs a cuei ; a bunore devant dì a la spelave, po a la fruçave e la meteve a cuei cun la aghe che le veve cuete, i zontave il lat molzut da la so vacje, e tra i doi licuits a saran stats un tre litros, ai meteve un poc di zucar e un chilo di farine di polente in maniere di ploe, mescolant ben, dopo une ore sul fouc a meteve un biel toc di spongje.
 ---
       A ere une famee grande, si sentavin in taule prime di là al lavor a
mangja il zuf cul lat fret, par ve cjalt il stomi. Sal vanzave a la sere a mangjavin il zuf fret cul lat cjalt.
---
La none a lave a preà cuant ca murive cualchi femine dal pais, a vaive a si lamentave insieme ad altris feminis, al semearès che cjapavin ancje cualchi franc. Antighis usancis ca van scomparint. E dopo cun altris a puartavin il casson su lis spalis fin tal samiteri.
----
Ancje ta chest câs no ai modificât la grafie, conservânt la variante locâl che ognidun al à tal so mût origjinari di fevelâ. Chest al è un altri ricuart furlan di Alice, che e à volût scompartîlu cun nô.
---